RAIS wa Zanzibar na Mwenyekiti wa Baraza la Mapinduzi, Mheshimiwa Dkt. Hussein Ali Mwinyi, amesema tamko la elimu bila malipo lililoasisiwa na Marehemu Mzee Abeid Amani Karume lilikisudia kuleta usawa ktk upatikanaji wa elimu kwa watu wote bila ya kuangalia itikadi ya mtu wala uchumi wake, hivyo ipo haja ya kuienzi ili kulinda matunda ya mapinduzi yetu Rais ameyasema hayo leo katika hotuba yake iliyowasilishwa na Makamu wa Kwanza wa Rais wa Zanzibar, Mheshimiwa Othman Masoud Othman, katika kilele cha maadhimisho ya 57 ya Sherehe ya Elimu Bila Malipo, zilizofanyika katika ya Kiwanja cha Gombani, Wilaya ya Chake Chake, Mkoa wa Kusini Pemba. Akiainisha baadhi ya maendeleo yaliyopatikana kwa kipindi cha miaka 57 ya Elimu bila Malipo, Mhe Dokta Mwinyi amesema, “kabla ya mapinduzi Zanzibar ilikuwepo na skuli (1) ya maandalizi, skuli 62 za msingi na skuli 5 za sekondari ila kwasasa kuna mabadiliko makubwa. Akimkaribisha Mgeni Rasmi, Waziri wa Elimu na Mafunzo ya Amali Zanzibar, Mhe. Simai Mohamed Said, amesema wizara yake ipo katika mageuzi makubwa kuhakikisha sekta hiyo inaimarika kwa mujibu wa mahitaji na kutoa fursa muhimu ya maendeleo ili kuendana na kasi ya mabadiliko duniani. Kabla ya hapo, Mkuu wa Mkoa wa Kusini Pemba, Mattar Zahor akiwasilisha salamu za wananchi wa mkoa huo ameipongeza Serikali ya Mapinduzi ya Zanzibar, kutokana na juhudi za kuhamasisha maendeleo ya elimu nchini kama ilivyokuwa dhamira ya waasisi wa Mapinduzi.
Tamsha la Elimu bila malipo kisiwani Pemba limezinduliwa rasmi leo, kwa kufanyika matembezi ya hiari yaliyoanzia Skuli ya Sekondari Fidel Kastro na kuishia katika viwanja vya Vitongoji Mkoa wa kusini Pemba.Akizungumza baada ya kupokea matembezi hayo, Mkuu wa Mkoa wa Kusini Pemba Mhe Matar Zahor Masoud amesema, ikiwa Zanzibar inasherehekea miaka 57 ya Elimu bila malipo ni vyema viongozi kutafakari kwa nini Serikali tokea mwaka 1964 inaendelea kusherehekea sherehe hizo kwa kutafakari wanapotoka katika suala la elimu. Amesema huko nyuma wazee hawakupata fursa ya kusoma na elimu ilikuwa ikitolewa kwa watu maalum na hata majengo yalikuwa ni machache mno, lakini hivi sasa kuna majengo mengi ya Skuli na ya kisasa mpaka vijijini ambapo amessma hali hiyo ni kuashiria kazi kubwa inayofanywa na Serikali ya Mapinduzi Zanzibar katika kuimarisha na huduma bora za elimu nchini. Amesema hayati Karume alikuwa na dhamira ya kuhakikisha kila mtu anasoma kwa mujibu wa ukomo wa akili yake na sio uwezo wa wazazi wake na huduma zote bure ikiwemo vitabu. Amewataka kuendelea na dhamira hiyo kwa kuwataka Wanafunzi kuendelea kusoma kwa bidii ili kuweza kuoata taifa lililo bora na lenye wasomi ambao ndio nguvu ya kuweza kuukuza uchumi wa nchi. Amesema Taifa bora litajengwa na viongozi bora huku akiwataka kuendelea kudumisha nidhamu kwa kuwasikiliza Wazazi na Walimu wao ili waweze kufanikiwa katika maisha yao pamoja na kuwataka Walimu kuwasimamia vyema wanafunzi hao. Hata hivyo amewahakikishia kuwepo kwa ulinzi na usalama wakati wote wa sherehe ndani ya Mkoa huo na kuwataka nao kushindana kwa amani na upendo ili kuendeleza umoja wa Zanzibar. Nae Afisa Mdhamini Wilaya ya Elimu mwalimu Mohammed Nassor, amesema ikiwa elimu bila malipo inatimiza miaka 57 ya Elimu bila malipo, Zanzibar kupitia Wizara ya Elimu, inaendelea kuienzi kauli ya Rais wa kwanza wa Zanzibar hayati Abeid Amani Karume juu ya kutekeleza azma hiyo. Amesema Wizara ya Elimu imeazimia na imejipanga kila mwaka kuadhimisha Tamasha hilo la elimu bila malipo ambapo kwa mwaka huu vijana zaidi ya Elfu mbili wapo kisiwani Pemba kwa ajili ya kushiriki michezo mbalimbali ya ngazi ya Kitaifa ili kuadhimisha sherehe hizo. Amesema visiwa vya Zanzibar kabla ya Mapinduzi matukufu ya mwaka 1964 elimu ilikuwa ikitolewa kwa matabaka ambapo wanyonge hawakupewa nafasi ya kusoma. Kilele cha maashimisho ya Elimu bila Malipo, kinatarajiwa kufanyika tarehe 23 septemba katika Uwanja wa Gombani Mkoa wa kusini Pemba, ambapo Kauli mbiu ya mwaka hu ni "Matumizi Sahihi ya Tehama katika mazingira ya uviko 19 yatarahisisha Elimu bila Malipo".